प्रतिनिधी (अरुण उजेडकर)
परभणी: शेतजमिनीची फेरमोजणी करून देण्याच्या मोबदल्यात १२ हजार रुपयांच्या लाचेची मागणी करून त्यापैकी ८ हजार रुपये स्वीकारणाऱ्या पाथरी येथील भूमी अभिलेख कार्यालयातील नीमतानदाराला लाचलुचपत प्रतिबंधक विभागाने (ACB) आज बुधवारी (दि. ८ एप्रिल) रंगेहात पकडले. रामेश्वर गुरुलिंगप्पा बिडकर (वय ४५) असे अटक करण्यात आलेल्या लोकसेवकाचे नाव आहे.
प्रकरणाची पार्श्वभूमी
तक्रारदार (वय ६३ वर्षे, रा. वडी, ता. पाथरी) यांच्या पुतण्याची गट क्र. २४ मधील शेतजमीन ढालेगाव बंधाऱ्याच्या बॅक वॉटरमध्ये गेली आहे. या जमिनीची पुनर्वसनासाठी भूमी अभिलेख विभागामार्फत मोजणी करण्यात आली होती, परंतु ती कमी भरल्याने तक्रारदाराच्या पुतण्याने उपविभागीय अधिकारी (SDO) पाथरी यांच्याकडे फेरमोजणीसाठी अर्ज केला होता. पुतण्याला ब्रेन ट्युमरचा आजार असल्याने तक्रारदार या कामाचा पाठपुरावा करत होते.
लाचेची मागणी आणि पडताळणी
हे काम करण्यासाठी नीमतानदार रामेश्वर बिडकर यांनी तक्रारदाराकडे १५,००० रुपयांच्या लाचेची मागणी केली होती. याप्रकरणी ७ एप्रिल रोजी लाप्रवि परभणीकडे तक्रार प्राप्त झाली. आज ८ एप्रिल रोजी सकाळी कार्यालयात करण्यात आलेल्या पडताळणी दरम्यान, बिडकर यांनी तडजोडीअंती १२,००० रुपये स्वीकारण्याचे मान्य केले.
सापळा कारवाई
पडताळणी झाल्यानंतर लाप्रविने पाथरी येथील साई मंदिर रोडवरील 'राऊत कटिंग दुकान' समोर सापळा रचला. ठरल्याप्रमाणे लाचेचा पहिला हप्ता म्हणून ८,००० रुपये तक्रारदाराकडून स्वीकारताना बिडकर यांना पथकाने पंचांसमक्ष ताब्यात घेतले.
कायदेशीर कारवाई
आरोपी: रामेश्वर गुरुलिंगप्पा बिडकर (नीमतानदार, उपअधीक्षक भूमी अभिलेख कार्यालय, पाथरी).
स्थळ: साई मंदिर रोड, पाथरी.
गुन्हा: भ्रष्टाचार प्रतिबंधक अधिनियम १९८८ च्या कलम ७ नुसार पाथरी पोलीस ठाण्यात गुन्हा नोंदवण्याची प्रक्रिया सुरू आहे.
घरझडती: आरोपीच्या नांदेड येथील निवासस्थानाची झडती घेण्याची प्रक्रिया सुरू करण्यात आली आहे.
कारवाई पथक:
ही यशस्वी कारवाई लाप्रवि परभणीचे पोलीस उपअधीक्षक श्री. महेश पाटणकर यांच्या मार्गदर्शनाखाली पोलीस निरीक्षक अल्ताफ मुलाणी व त्यांच्या पथकाने केली आहे.
Post a Comment
0 Comments